असल नेता त्यही हुन्छ, जो जनताको सुखदुःखमा साथ दिन्छ । यति बेला कोरोना भाइरसका कारण विश्व नै आतङ्कित बनिरहेको छ । यो सङ्कट असल नेताको परीक्षाको बेला पनि हो । यो परीक्षामा खरो उत्रेका एक नेता हुन्- नवराज ओझा । कास्कीको रुपा गाउँपालिकाका अध्यक्ष ओझा आफैं जनताको घरदैलोमा पुगेर औषधि तथा राहत वितरण गरिरहेका मात्र छैनन्, गाउँपालिकाबासीको सुरक्षाका लागि नाकाहरुमा स्वयम् सेवकहरुसँगै रातदिन खटिइरहेका पनि छन् । `सङ्कटले हिरो जन्माउँछ´ भने झैं यो विश्वव्यापी महामारीका बेला सर्वत्र प्रशंसित उनै `हिरो´ नवराज ओझासँग सारङ्गी न्युजका लागि गरिएको कुराकानीको सम्पादित अंश यहाँ प्रस्तुत गरिएको छ :
# कोभिड-१९, कोरोना भाइरसविरुद्धको अभियान कसरी अघि बढेको छ ?
* हामीले रुपा गाउँपालिकाभित्र रहेका व्यक्तिहरु, जो वैदेशिक रोजगारीबाट फर्किनुभएको छ, उहाँहरुमार्फत् कोरोनाको सङ्क्रमण नफैलियोस् भनेर चैत्र ७ गते कार्यपालिकाको बैठक बसेर सुरुमा रुपा- ५, देउरालीको विश्वशान्ति मा. वि.मा २६ जनाको क्षमता भएको क्वारेन्टिन राख्ने भनेर निर्णय गर्यौं । ११ गतेबाट सन्चालनमा ल्यायौं । जहाँ २४ जना भारत, कतार, साउदी र दुबईबाट आउनुभएका व्यक्तिहरुलाई सुविधा सम्पन्न वाइफाई, प्रत्येक कोठामा डिसहोम जडित प्रोजेक्टरमार्फत् हेर्न मिल्ने गरेर टेलिभिजनको व्यवस्थासहित WHO को नर्म्सअनुसार कोठाको व्यवस्थापन गर्यौं ।
# क्वारेन्टिनमा बस्नेहरुको खानपान र स्वास्थ्य परीक्षणको व्यवस्था कसरी गर्नुभएको छ ?
* त्यहाँ दिनमा ४ जना स्वास्थ्यकर्मीले दिनको ४ पटक उहाँहरुको स्वास्थ्य परीक्षण गर्ने र बेलुका २ जना स्वास्थकर्मीलाई आवासीय व्यवस्था गरेका छौं । उहाँहरुलाई खाना, खाजा तथा फलफूल मिलाएर खुवाउने व्यवस्था गरेका छौं ।
# गाउँपालिकाभरिका क्वारेन्टिनमा बस्नुपर्ने सबैलाई यसैमा राख्नुभएको छ ?
* अहिले यहाँको क्वारेन्टिनबाहेक होम क्वारेन्टिनमा ३१ जना वैदेशिक रोजगारबाट फर्केका व्यक्तिहरु हुनुहुन्छ, जसको दैनिक एक जना स्वास्थकर्मी घरमै पठाएर स्वास्थ्य परीक्षण गर्ने गरिएको छ ।
# गाउँपालिका नै सिल गर्नुभएको छ । यसका लागि कहाँ कहाँबाट नाका बन्द गर्नुभएको छ ?
* अहिले गाउँपालिका प्रवेश गर्ने मुख्य ९ वटा नाकाहरु छन्, ती सबै नाकाहरु हामीले सिल गरेका छौं । अहिले अझ सङ्क्रमणको अवस्था बढ्दै छ, तसर्थ गाउँपालिकालाई कोरोनाको सङ्क्रमणबाट सुरक्षित राख्न गाउँपालिका प्रवेश गर्ने मुख्य नाकाहरु सिल गर्ने भनेर गाउँपालिकाको प्रत्येक वडाको सिफारिसमा २८ जना स्वयम् सेवक युवा दस्ता निर्माण गरी प्रत्येक नाकामा १ जना प्रहरी, २ जना स्वयम् सेवक र १ जना स्वास्थकर्मी २४ सै घन्टा खटिएर आवतजावतमा रोक लगाएका छौं ।
# दीर्घ रोगी छन्, बिरामी हुन सक्छन् । उनीहरूलाई के गर्नुहुन्छ ?
* यो अवस्थामा कोही अचानक बिरामी पर्नुभएमा २४ सै घन्टा निःशुल्क एम्बुलेन्सले हस्पिटलसम्म लाने व्यवस्था गरेका छौं । आवश्यक पर्दा गाउँपालिकाकै गाडी पनि सधैं तयार रहन्छ । दीर्घ रोगीहरु, जो नियमित रुपमा औषधी सेवन गरिरहने व्यक्ति हुनुहुन्छ, उहाँहरुलाई हामीले औषधी ल्याएर घर घरसम्म पुर्याउने व्यवस्था गरेका छौं ।
# दैनिक ज्याला, मजदुरी गरी खाने वर्गलाई राहत वितरणको अवस्था के छ ?
* गाउँपालिकाभित्रका दैनिक रुपमा ज्यालादारी गरी खाने मजदुर, श्रमिक वर्ग दिनभर काम गरेर बेलुका खाने व्यक्तिहरुका लागि हामीले केन्द्रीय सरकारको राहत वितरण मापदण्डअनुसार आवश्यक खाद्यान्न गाउँपालिकामै स्टोर गरिसकेका छौं, जसका लागि वास्तविक मजदुर, श्रमिक वर्गको लागत सङ्कलन गरी छिट्टै राहत वितरण गर्ने छौं । यसका लागि स्वास्थकर्मी, सुरक्षाकर्मी, कर्मचारी, जनप्रतिनिधि सबै जनाले दिनरात नभनी खटिएर लागिरहनुभएको छ ।
# गाउँपालिकाबासीको सहयोग कस्तो छ ?
* गाउँपालिकाबासीहरु आफैंले स्वत:स्फूर्त रुपमा सहयोग गरिरहनुभएको छ। यहाँका क्लब, आमा समूहहरु आफैं खटिएर कोरोना भाइरससम्बन्धी जनचेतना जगाउने साथै सल्लाह सुझावहरु दिइरहनुहुन्छ । उहाँहरुको इच्छा र सुझावको साथमा हामी अगाडि बढिरहेका छौं ।
# उल्लङ्घन गर्न पाउँदा विजयको महसुस गर्नेहरु पनि होलान् । उनीहरुलाई कसरी व्यवस्थापन वा कारबाही गर्नुभएको छ ?
* उहाँहरुलाइ कारबाही भन्दा पनि हामी अहिलेको अवस्था र हुन सक्ने भयावह अवस्थाको बारेमा राखेरै सम्झाउने गरेका छौं । अहिलेसम्म त्यस्तो कारबाही नै गर्नुपर्ने अबस्था आइहालेको छैन ।
# गाउँपालिकाभित्र मात्रै प्रवेश गर्न नपाइने हो कि गाउँपालिकाभित्रबाट बाहिरिन पनि नपाइने हो ?
* दुवैतिरबाटै निषेध हो । गाउँपालिकाभित्र पनि प्रवेश गर्नै नपाइने, रुपाबासी व्यक्ति जो प्रवेश गर्नुहुन्छ भने १४ दिनसम्म अनिवार्य होम क्वारेन्टिनमा हाम्रो स्वास्थकर्मीको निगरानीमा बस्नुपर्ने हुन्छ । जो बाहिर जानुहुन्छ, यो सङ्क्रमणको अवस्था नसकिन्जेल पुन: प्रवेश गर्न नपाउने नै भनेका छौँ । त्यहीअनुसार नै गरेका पनि छौं ।
(स्मरण रहोस्- रुपा गाउँपालिकाले चैत १९ देखि नै आफ्नो स्थानीय तहबाट बाहिरिन वा प्रवेश गर्न रोक लगाएको थियो भने नेपाल सरकारले चैत २२ देखि मात्र यो निर्णय लागू गरेको थियोे ।- सं.)
# कहिलेसम्म जारी रहन्छ यो बन्द ?
* अहिले सङ्क्रमणको अवस्था अझ बढिरहेको छ । सरकारको लकडाउनको अवस्था कस्तो हुन्छ, त्यहीअनुसार हामी थप्दै जान्छौं ।
# गाउँपालिका र गाउँपालिका मातहतका कार्यालयबाट दिइने सेवाको अवस्था चाहिँ के छ अहिले ?
* गाउँपालिकाबाट अहिले सरकारले विभाजन गरेका अत्यावश्यक सेवाबाहेकका अरु सेवाहरु बन्द छन् भने स्वास्थ संस्थाहरु २४ सै घन्टा खुल्ला राख्ने व्यवस्था गरेका छौं ।
# अन्त्यमा भन्दिनुस् न, खाद्यान्नलगायतको व्यवस्थापन कसरी गर्नुभएको छ ?
* लकडाउन र सिमा लकको समय बढ्दै जाँदा उत्पन्न हुने खाद्य सङ्कटलाई मध्यनजर गर्दै हामीले खाद्यान्नको व्यवस्था पनि गरिसकेका छौं । हाम्रो यो प्रतिबद्धता पनि हो, हाम्रा हरेक नागरिकमा हामी खाद्य सङ्कट हुन दिँदैनौं । सीमा लक गरेपश्चात् खाद्य समस्या नहोस् भनेर खाद्यान्नको गाडीलाइ निश्चित समय तोकेर नकामा चेक गरी स्प्रे गरेर प्रवेशका लागि अनुमति दिइन्छ ।
प्रस्तुति : रुपिन्द्र प्रभावी
