भोर्लेटार (लमजुङ) । नेपालको दोस्रो पशुपतिनाथका रूपमा परिचित लमजुङको प्रसिद्ध धार्मिक मन्दिर ईशानेश्वर महादेव मन्दिरको सुव्यवस्थाका लागि गठित ईशानेश्वर महादेव मन्दिर क्षेत्र विकास समिति, करापुटार लमजुङको बाह्रौँ साधारण भेला शुक्रबार सम्पन्न भएको छ ।
ईशानेश्वर महादेव मन्दिर क्षेत्र विकास समितिका अध्यक्ष रामचन्द्र घिमिरे शास्त्रीको अध्यक्षता, मध्यनेपाल नगरपालिकाका उपप्रमुख राजकुमार श्रेष्ठको प्रमुख आतिथ्य र मध्यनेपाल नगरपालिका वडा नं। ७ का वडाध्यक्ष एवम् नगर प्रवक्ता गगन घिमिरेको विशेष आतिथ्यमा कार्यक्रम सम्पन्न भएको हो । समितिका सचिव शङ्करराज घिमिरेले सञ्चालन गर्नुभएको उक्त कार्यक्रमलाई स्वस्तिवाचनका साथ गोविन्दप्रसाद सोतीले आरम्भ गर्नुभएको थियो भने समितिका महिला उपाध्यक्ष राज्यलक्ष्मी सोतीले स्वागत मन्तव्य राख्नुभएको थियो ।
कार्यक्रममा समाजसेवी विष्णुहरि घिमिरे, पूर्व शिक्षक पशुपति घिमिरे, ईशानेश्वर क्याम्पसका क्याम्पस प्रमुख रमेशचन्द्र घिमिरे, लेखा समितिका संयोजक रामचन्द्र सोती, पूर्व महासचिव खगराज घिमिरे, राप्रपा जिल्ला सदस्य चतुर्भुज घिमिरे, नेकाका जिल्ला सदस्य एवम् वरिष्ठ उपाध्यक्ष मदनकुमार न्यौपाने, नेकपाका जिल्ला सदस्य नवराज घिमिरे लगायतले शुभकामना मन्तव्य राख्नुभएको थियो भने समितिका कोषाध्यक्ष गजेन्द्रराज घिमिरेले आय–व्यय विवरणसहित आर्थिक प्रतिवेदन प्रस्तुत गर्नुभएको सहभागी अतिथि सन्तोष कोइरालाले बताउनुभएको छ ।
कार्यक्रमका प्रमुख अतिथि नगर उपप्रमुख राजकुमार श्रेष्ठले ईशानेश्वर महादेव मन्दिर क्षेत्रमा धार्मिक होम स्टे सञ्चालनका लागि मध्यनेपाल नगरपालिकाका तर्फबाट आफूले सहयोग गर्ने प्रतिबद्धता व्यक्त गर्दै यस क्षेत्रको विकासका लागि राजनीतिक पूर्वाग्रह नराखी एक जुट हुनुपर्ने धारणासमेत राख्नुभएको थियो
उक्त भेलामा आगामी महाशिवरात्रिका लागि विभिन्न २० वटा उपसमितिहरू गठन गरिएको र उक्त उपसमितिलाई आगामी वैठकले पूर्णता दिने जानकारी संस्थाका महासचिव कृष्ण बरालले सारङ्गी न्युजलाई गराउनुभएको छ ।
